Welcome development para sa Bayan Muna ang pagdeklarar sang Korte Suprema nga unconstitutional ang General Appropriations Act sang 2024 kag 2025 bangod nagalalapaw nga unprogrammed appropriations kag budget insertions.
Sa interview sang Bombo Radyo Bacolod kay Bayan Muna Chairperson Atty Neri Colmenares, madugay na nila nga ginabatikos ang budget insertions, gani kadalag-an para sa ila nga ginpaboran sang Korte Suprema ang mga petitioners, nga makonsiderar nga kadalag-an man sang mga pumuluyo.
Pahayag ni Colmenares nga sa 2024 national budget, P281 billion ang unprogrammed funds sa ginduso nga National Expenditure Program sang Presidente, amo man ang balor nga ginpasar sa House of Representatives, kag sa Senado, apang pagdangat na sa Bicameral Conference Committee, ini ang gindugangan sang P449 billion, gani nangin P731 billion ang unprogrammed funds.
Pahayag sini nga wala na dapat sang dako pa nga pagbag-o bangod halos parehas man ang gin-aprubahan sa Kamara kag Senado, kag naggwa nga mas makagagahom pa ang Bicam sangsa mga nagboto nga Kongresista kag Senador.
Pahayag ni Colmenares nga ang pagdeklarar sang korte suprema nga unconstitutional ang budget, ang maga-apekto man sa budget sa kasunod nga mga tinuig.
Paathag niya nga wala pa matapos implementar ang tanan nga proyekto sa idalom sang 2025 budget, gani ang mga proyekto nga napondohan paagi sa unprogrammed funds kag budget insertions ang masuspender.
Kasubong man ang ongoing projects sa idalom sang 2026 budget.
Samtang dapat naman nga bawion sang Kamara ang naaprubahan nga budget para sa 2027 nga ginpasaka na sa Senado, para mareview kag makakas ang mga indi nagakadapat nga unprogrammed budget.
Panawagan naman nila sa Senado nga kun mapasaka na liwat sang Kamara ang budget proposal, ini ang dapat maid-id gid nga tsekyaron agud indi malutsan sa ila nga mangin bersyon, antes ipasaka sa Presidente.
