Patay ang amay samtang nakapalagyo naman ang anak matapos ginkastigo kag gintiro sang ginapatihan anum ka mga suspetsado sa Sitio Minasug-ang, Barangay Tabun-ac, Toboso sang Mayo 15 sang gab-i.
Ginkilala ang biktima nga si Emiliano Imalay, 61-anyos, samtang ang nakapalagyo nga bata amo si Isagane Imalay, lunsay residente sang Sitio Toril, Barangay Bandila, sa nasambit nga banwa.
Suno sa imbestigasyon sang Toboso Municipal Police Station, ang mag-amay ang naga-inom sang makahulubog nga ilimnon sang hinali lang nga ginpalapitan sang wala makilal-an nga suspetsado kag hinali nga ginkastigo si Isagane kag ginlampusan sang botilya.
Ang duha ka mga suspek ang nagkuha man sang wala matumod nga kalibre sang armas-luthang kag gintiro si Emiliano.
Gindala naman ini sa ospital apang gindeklarar nga dead on arrival.
Nakapalagyo kag napanago naman si Isagane.
Sa karon, padayon sa gihapon ang imbestigasyon sang kapulisan sa pagpangita kag pagdakop sa mga suspek, kag sa paghibalo sang motibo sang krimen.
