Patay ang mangunguma kag small time businessman matapos ginluthang sang apat ka armado nga persona sa alegasyon nga asset sang militar sa Sitio Bebang, Brgy General Luna, Toboso, Negros Occidental kahapon.
Sa interview sang Bombo Radyo Bacolod kay Police Master Sgt Eugene Kangkee, chief investigator sang Toboso Municipal Police Station, ang biktima nga ginkilala lamang nga si Alyas Joel ang bag-o lang nakaabot sa ila balay gikan sa Toboso Public Market bangod ini ang nagbooking sang magabakal sang iya ipaihaw nga baboy.
Apang pag-abot sa balay, sila ang hinali nga ginsulod sang apat ka armado nga persona kag ginpagwa ang biktima.
Kaupod ni Joel sa balay ang iya asawa kag ang ila 10 anyos nga bata nga babayi.
Suno kay Kangkee, nahimo pa sang bata nga magsunod sang ginkuha ang iya amay kag nakita sini nga ginabaklid si Joel, apang siya ang ginsita sang isa sa mga suspect kag ginpabalik sa balay.
Nakabati na lamang ang mag-asawa sang lima ka lupok sang pusil.
Suno kay Kangkee, sa ulo tanan ang igo sang biktima.
Matapos ang krimen, nagbalik pa ang mga suspect sa balay kag ginkuha ang cellphone sang biktima kag sang bata.
Kuhaon man kuntani ang cellphone sang asawa apang ini ang naghingyo nga indi kuhaon bangod diri nakalista ang mga contacts kag listahan nila sa negosyo.
Pahayag sang mga suspect nga ginpatay nila si Joel bangod sa alegasyon nga ini ang asset sang militar.
Ang cellphone ang gamiton naman nila nga ebidensya sa ila nga korte.
Wala ginadula ang posibilidad nga rebelde nga New People’s Army ang may kahimuan sang krimen, apang ang makawala nga grupo ang wala pa nakapagwa sang statement.
Narecover sa crime scene ang tatlo ka basiyo sang cal 5.56mm, subong manang isa ka basiyo kag isa ka slug sang cal. 9mm.
Suno kay Kangkee, ang biktima ang nagapanguma, may tyangge, gamay nga baboyan kag nagasagod sang iban pa nga kasapatan, samtang sila ang wala naman sang kaingod, kun sa diin ang pinakamalapit ang kapin 300 metros pa ang kalayuon sa ila balay.
