Nakaagom sang pilas sa natuo nga batiis ang isa ka lalaki matapos nga tuyo kuntani sindihan ang fuel pump sang isa ka fuel station sa banwa sang Binalbagan, Negros Occidental sang Mayo 16.
Personal nga nagpadulong sa police station ang 25 anyos nga manager sang Petron Binalbagan nga residente sang Barangay Tinungan, Isabela, Negros Occidental agud nga magpangayo sang bulig bangud sa insidente sang malicious mischief ukon hungod nga paguba sang gasolinahan.
Sang nagresponde ang alert team sang Binalbagan Municipal Police Station naabtan sang mga police ang suspek nga may ginauyatan nga binangon nga ginagamit sa paglabo sang fuel pump meter.
Gintinguhaan sang mga otoridad nga pakalmahon ang suspek apang wala ini nagapamati gani ang mga kapulisan ang napilitan nga tiruhon ini sa natuo nga batiis agud nga mag-untat sa pagguba sa fuel station kag gindala man gilayon sa Binalbagan Infirmary Clinic agud nga madapatan sang nagakaigo nga pagbulong.
Samtang ginapreparar naman ang ipasaka nga kaso nga Arson, Malicious Mischief kag Assault batok sa suspetsado.
