Gin-ako sang New People’s Army nga sila ang may kahimuan sa pagpatay sa anay konsehal sa banwa sang Isabela sa Sitio GMA, Brgy Payao, Binalbagan alas-5:00 sang Domingo sang hapon.
Sa interview sang Bombo Radyo Bacolod kay Police Captain Joelan Vinson, hepe sang Binalbagan Municipal Police Station, may yara sila sang nabaton nga impormasyon nga gin-ako sang NPA nga sila ang nagpatay sa retired army kag anay konsehal sa banwa sang Isabela.
Madumduman ang biktima nga ginkilala nga si Rodulfo Pajardo, residente sa Brgy 4, Isabela ang nagpadulong sa iya kakampuhan nga nga ginapahilamunan sini.
Pagdangat sa lugar, hinali man nga nag-abot ang duha ka motorsiklo nga parehas nga may tig-isa nga angkas.
Hinali na lamang gintiro si Pajardo sang duha ka backrider, kag ini ang nag-agom sang igo sang bala sa ulo, lawas kag sa hita nga gintunaan sang iya kamatayon.
Ang mga suspek may tabon ang nawong kag gilayon nga nagpalagyo ang apat padulong sa nabukid nga bahin sang Brgy Payao.
Narecover sa crime scene ang mga basiyo sang cal 45 kag 9mm pistol.
Padayun sa karun ang maid-id nga imbestigasyon sa krimen, kag nagapangita man ang kapulisan sang mahimo nakawitness agud matumod ang mga suspects kag motibo sa krimen.
