Nagdangat sa 4.6 kilos nga kabug-aton sang suspected shabu ukon halos P33 million ang balor sang nakumpiskar sa tatlo ka ginpatigayon nga drug buybust operation sa ciudad sang Bacolod kahapon, Mayo 18.
Una nga operasyon ang ginpatigayon sang Bacolod City Drug Enforcement Unit sa Barangay Estefania, Bacolod City.
Ginkilala ang naaresto nga si Jom Flynn Banquillo alias Drake, high value invidual, 37 anyos male, single, wala sang trabaho kag residente sang Country Homes Subdivision, Brgy. Estefania, Bacolod City.
Narecover diri ang 2,500 grams sang suspected shabu nga may standard drug price nga P17,000,000.
Ikaduha nga operasyon ang ginpatigayon sang Bacolod Police Station 2 sa Purok Lampirong, Barangay 2, Bacolod City.
Ang nadakpan ang ginkilala nga si Robert Villanueva Delos Santos, single, wala sang trabaho, kag residente sang Purok 42, Bayanihan, Brgy. Villamonte, Bacolod City.
Nakumpiskar kay Delos Santos ang kapin sa isa ka kilo sang suspected shabu nga may standard drug price nga P6,800,000.
Samtang, ang ikatatlo nga operasyon amo ang sa Purok Hollow Blocks, Barangay Singcang-Airport ciudad sang Bacolod kun sa diin masobra sa P9.1 million nga balor sang suspected shabu ang narecover sang Bacolod Police Station 8 sa isa ka babayi nga residente sang ciudad sang Iloilo.
Natigayon nga marecover ang 1100 grams sang suspected shabu nga may standard drug price of P9,130,000.
Ang suspek ang ginkilala kay alyas Chery kag residente sang Brgy. San Pedro, Jaro, iloilo City.
Sa interview sang Bombo Radyo Bacolod kay Police Col Joeresty Coronica, Bacolod City Police Office Director, madamo na sang pamaagi agud mahapos nga matransport ang illegal nga druga.
Suno kay Coronica remarkable man ang operasyon sang BCPO bangud dako nga volume sang Illegal nga druga ang ila nakumpiskar.
Mahimo nga by sea travel ukon RoRo ang ginagamit nga transportasyon nga magdeliver sang illegal nga druga kag may mga pamaagi ang mga ini kaangay sang pagputos sa plastic sang gatas, pagpadala sa mga shipping company kag madamo pa.
Subong mahapos na ang tanan gani indi na mabudlay ang pagtransport sang illegal nga druga.
