Wala sang foul play nga nakit-an sa nagluntad nga sunog nga nakapatay sa duha ka bata sa Purok Lison, Brgy 1, ciudad sang Bacolod kahapon sang kaagahon.
Sa interview sang Bombo Radyo Bacolod kay Fire Officer 2 Rolin Paulan, Fire Chief Investigator, Bacolod City Fire Station, nakasindi ang kandila nga gintongtong sa lamisa malapit sa ila pertahan.
Suno diri, ang katre nga ginatulogan sang walo kag anum ka tuig nga bata ang malapit lang man sa pertahan nga wala man naka-padlock.
Pahayag ni Paulan, wala sang foulplay sa natabo kag kandila nga posible nahulog ang rason nga naglapta ang kalayo.
Samtang, sa karun yara na sa estable nga kondisyon ang lolo sang mga bata nga gindala sa ospital matapos mag-angkon sang 2nd degree burn sa natuo nga kamot kag guya kag 1st degree burn sa nawala nga kamot.
Pahanumdom ni Paulan nga indi pagbayaan ang mga kabataan nga sila lang sa sulod sang balay kag dapat sila nga tudluan kun ano ang himoon kun may emerhensya.
