Gin-claim na sang pamilya ang bangkay sang biktima nga ginbakol sang stick sa Barangay Pahanocoy, ciudad sang Bacolod.
Positibo nga ginkumpirmar sang utod sang biktima ang iya identity.
Madumduman nga sang nakaligad nga adlaw, ginpapanawagan sang kapulisan sa Bombo Radyo ang nasapwan nga bangkay sa nasambit nga Barangay.
Ang biktima ang ginkilala nga si Dennis Flores, 38 anyos, lalaki, kag residente sang banwa sang Moises Padilla, Negros Occidental.
Ang biktima ang napatay sang Setyembre 19, Sabado sang aga apang nasapwan Dominggo na sang hapon, Setyembre 20.
Sa interview sang Bombo Radyo Bacolod kay Police Captain Patrick Lacandula, Officer in charge sa Bacolod Police Station 8, ginpahayag nga agaway sa pagkaon ang rason sang krimen.
Suno diri, ginbakol sang suspek ang biktima gamit ang ratan nga stick.
Nakaagom sang pila ka head injuries ang biktima nga gintunaan sang iya kamatayon.
Suno kay Lacandula, sang Miyerkules sang aga, ginpadulungan sang himata sang biktima ang bangkay sa Handumanan, ciudad sang Bacolod agud i-kumpirmar nga ini ang ila pamilya.
Positibo ini nga ginkilala sang utod.
Sa bulig sang Bacolod Police Station 8, natigayon nga mapalubong sa public cemetery sa Handumanan ang bangkay bangud wala sang ikasarang ang pamilya nga ibyahe pa ini pakadto sa banwa sang Moises Padilla.
Sa pihak nga bahin, suno kay Lacandula, nadakpan ang suspek apang gilayon man ini nga na-release bangud wala na nagpasaka sang kaso ang pamilya kag nag-file sang affidavit of non-interest.
