Nahimo nga mapatakas ang naggu-ot nga canter truck bangod sa lahar flow sa Sitio Tamburong, Barangay Biak na Bato, sa banwa sang La Castellana paagi sa ginhimo nga bayanihan sang mga pumuluyo.
Nahibaluan nga nagluntad ang mabaskog nga pagbubo sang ulan pasado-11:00 kagab-i nga ginsundan sang lahar flow.
Sa interview sang Bombo Radyo Bacolod kay Jhovel Roquero, 49 anyos, driver sang Canter Truck, pasado ala-1:00 sang kaagahon sang sila ang maglabay sa area agud kuntani magpadulong sa Canlaon City agud mangumpra sang utan.
Apang pagdangat sa lugar, nakasugata nila ang tricycle nga nagu-ot sa lutak, gani ginlikaw sini ang salakyan.
Apang wala niya ginalauman nga mas may madalom nga buho sa iya ginlikuan rasun nga nastrander ang salakyan.
Kaupod sini sa byahe ang tag-iya sang canter truck kag apo sini, nga lunsay nag-upod nalang sa naglabay nga truck nga nangumpra man sang utan.
Samtang siya ang nagtulog-tulog na lamang sa salakyan tubtob mag-adlaw bangod indi sini mapatakas ang truck.
Gikan sa ala-1:00 sang kaagahon nga pagkagu-ot, nalab-utan sang pasado alas-8:00 sang aga antes nakahalin ang salakyan.
Ini bangod sa pagbuligay man sang mga residente sa nasambitan nga lugar.
Wala nalang ini nagdayon sa pagsaka sa Canlaon City, sa baylo siya ang nagbalik na lamang sa Barangay Granada, Bacolod City.
