Nakilala na ang lalaki nga ginbuno patay sang driver sang wing van sa Purok Riverside, Barangay Banago Bacolod City sang Hunyo 1.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, ang biktima ang ginkilala nga Mark Jaime Villegas, 23 anyos, single kag residente sang Purok Camsi, Hacienda Lag-asan, Barangay Tinampa-an, Cadiz City, Negros Occidental apang temporaryo nga nagapuyo sa Purok Riverside, Barangay Banago, Bacolod City.
Suno kay Tapang, nagacoordinar sila sa pamilya sang biktima bangud kinahanglan pa nila ang mga dokyumento kaangay sang death certificate agud nga mainquest kag mapasaka ang kaso nga homicide batok sa suspek nga nakahunong sagihapon sa Bacolod Police Station 3.
Una na nga ginpahayag ni Tapang nga ginbuno sang suspek ang biktima matapos nga gin-alegar nga tuyo nga magpangawat sa iya nga van.
Antes pa man nabun-an ang biktima may yara pa sang nagluntad nga komosyon sa tunga sini kag sang suspek.
