Ginpadulungan sang katapo sang Bacolod City Engineers Office ang bahin sang nabahaan sa Country Homes Subdivision, Barangay Estefania, Bacolod City agud nga magpatigayon sang initial inspection.
Sa interview sang Bombo Radyo Bacolod kay Engineer Loben Seballos, santo sa ila obserbasyon kaupod ang homeowners sang phase 1 sang nasambit nga subdivision kag mga engineers sang Rockwell nakita nila nga sadto may buslot ang pader sa portion sang propedad nga ginaagyan sang tubig.
Suno kay Seballos, sang wala pa ang Rockwell dira nagaagi sa buho ang tubig kun mag-ulan apang sang ini ang nabakal na wala na sang maagyan tubig bangud natabunan na sang pader.
Sang ginkadtuan nila ang bahin sang nasambit nga developer may nakita sila nga halin sa subdivision may duha ka .45 meters nga drainage nga nagagwa sa bahin sang nasambit nga propedad.
Gintrace man nila ang drainage kun sa diin ang nasambit nga subdivision ang nagatupad man sa Villamar sa Barangay Estefania kag tupad sini ang phase 3 sang subdivision kag nakita nga didto ang isa ka outfall sang tubig gikan sa Phase 1 sang nasambit nga subdivision.
Suno kay Seballos bangud ginbutangan sang Rockwell sang retaining wall ang ila boundary sang Country Homes natabunan ang buho kun sa diin nagagwa ang tubig kun mag-ulan.
Bangud sini ginbutangan sang developer sang catch basin agud masalod sang tubig kag magailig sa duha ka .45 meters nga drainage nga halin sa subdivision apang ang outfall ang sa Villamar.
May nakita man sila nga drainage 1-meter ang kadalumon sa bahin sang Country Homes nga barado gani ang conclusion sa karun ang ipakalkal ang mga bara kag panilagan kun magbaha pa liwat bangud ang duha ka .45 meters nga drainage sang nasambit nga subdivision ang kulang.
Gin-athag man sini nga ang drainage master plan ang nagahatag lamang sila sang recommendation apang ang naga-approve ang Bacolod Housing Authority.
