Personal nga gin-inspeksyon ni President Ferdinand “Bongbong” Marcos Jr. ang Siquijor Diesel Power Plant sa Candanay Sur, Siquijor bangud sa pasulit-sulit nga power supply interruptions sa isla kun sa diin tuman nga naapektuhan ang mga residente, negosyo kag tourism industry sa lugar.
Sa iya nga pag-inspeksyon nakighinun-anon na si President Marcos sa mga plant engineer sang Siquijor Island Power Corporation (SIPCOR) nga nagaoperate sang Siquijor Diesel Power Plant, kag mga opisyal sang local government unit (LGU) agud nga mahatagan sang sabat ang krisis sang kuryente.
Ginmanduan man ni President Ferdinand R. Marcos Jr. ang Department of Energy (DOE) nga hatagan sang solusyon ang pasulit-sulit nga power interruptions sa probinsya sang Siquijor kag pasanyugon ang mga tikang agud nga masolusyunan ang mga kakulangan sa supply sang kuryente.
Suno kay Marcos, personal ini nagpadulong sa isla agud nga lantawon ang sitwasyon bangud madamo sang apektado sa natabo wala untat nga power interruptions.
Suno sa president magaabot na halin sa Palawan ang duha ka dalagko nga generator sets para maghatag sang gilayon nga supply sang kuryente sa bug-os nga isla.
Sa isa ka interview, nagpangako si SIPCOR operations chief Roger Gambuta nga magasunod sila sa direktiba ni President Marcos agud nga sabton ang kinahanglanon sang mga taga-Siquijor.
Sa karun ang apat ka banwa nga ginalakipan sang San Juan, Enrique Villanueva, Larena, kag Siquijor, ang nakaeksperyensya sang brown-out.
