Lauman ang gamay nga pagnubo sa presyo sang produktong petrolyo sa masunod nga semana kun mangin kalmado ang sitwasyon sa Middle East kasunod sa ceasefire sa tunga sang Israel kag Iran.
Santo sa duha ka adlaw nga trading sa global oil market, suno kay Jetti Petroleum president Leo Bellas lauman ang rollback nga P0.80 tubtob sa P1.10 nga rollback sa presyo sang diesel sa kada litro.
Samtang lauman naman nga posible magsaka sa P0.10 ukon magnubo sa P0.20 ang kada litro sang Gasolina.
Suno diri, nagnubo man ang global oil prices kasunod sa ceasefire samtang ginabantayan ang sitwasyon sa Middle East.
Subong nga semana, nag-agree ang mga oil firms nga mag-implementar sang staggered basis nga price hike agud indi magulpihan ang mga motorista sa kapin sa P5.00 nga saka sa kada litro sang diesel.
Sang Martes, ang presyo sang Gasolina nagsaka sa P1.75; ang presyo sang Diesel nagsaka sa P2.60 kag ang presyo sang Kerosene nagsaka sa P2.40 kada litro.
Apang, kahapon liwat nga nagsaka ang presyo sang produktong petrolyo sa amo man nga presyo kun sa diin sa kabug-usan nagsaka sa P3.50 ang kada litro sang Gasolina, P5.20 ang kada litro sang Diesel kag P4.80 ang kada litro sang Kerosene.
