Ginalantaw nga nakagamit sang illegal nga druga ang suspect sa pagpangluthang sa Block 2, Abada Escay, Brgy. Vista Alegre, Bacolod City sang Sabado sang gab-i.
Ang biktima ang nagapaayo sa karun sa ospital sa ciudad sang Bacolod.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, may yara sila sang nabaton nga impormasyon nga may yara sang shooting incident nga nagluntad sa nasambit nga lugar.
Suno kay Santillan, gilayon man nila nga ginrespondehan ang report kag ang biktima ang gindala sa ospital matapos nga makaangkon sang igo sang bala sa dughan.
Suno diri nakakuha man sila sang description sang suspek gikan sa biktima kag nagpatigayon sang hot pursuit operation kun sa diin nadakpan man ini.
Ang suspek ang ginkilala lamang kay alyas Duncan Ramos kag residente man sang nasambit nga Barangay.
Nakuha sa paghinakop sang suspek ang 12 grams sang suspected shabu nga may street value nga P81,600; isa ka caliber .45 pistol may magazine kag may unod nga bala nga gingamit sa pagtiro sa biktima.
Sang ginpamangkot ang suspek kun ngaa gintiro niya ini, lain lain ang sabat kag nagpahayag nga nasal-an lamang sini nga aswang ang biktima.
Ang suspek ang nakaagi naman priso apang nakagwa matapos nga makapiyansa sa kaso nga frustrated murder.
Sa karun yara na ini nakahunong sa custodial facility sang Bacolod Police Station 7.
