Nakuhaan sang suspected shabu ang isa ka 11 anyos nga lalaki sa Abada Escay, Barangay Vista Alegre, Bacolod City kahapon sang hapon, Hulyo 8.
Sa interview sang Bombo Radyo Bacolod kay Barangay Kagawad Elizalde Benedicto, ginpalapitan nila ang bata kun sa diin ginhaboy sini gilayon ang sachets sang suspected shabu, nga iya nga ginpulot.
Suno kay Benedicto, ginpamangkot nila ang menor de edad kun sa diin sini ginkuha, apang sabat sang bata nga ini ang gikan sa basurahan.
Apang wala man nakumpirmar kun sa basurahan gid man nakuha sang bata ang ginapatihan illegal nga droga.
Pahayag pa sang Kagawad, nga ang lugar kun sa diin narecover ang sachets sang suspected sa shabu ang kilala naman nga madata ang pagbaligyaanay sang illegal nga druga.
11 ka sachets sang suspected shabu ang narecover kun sa diin nagabug-at sang kapin sa 5 grams.
Wala naman ginpamangkot dugang ang bata bangud mahimo nga ini ang matrauma.
Suno sa Barangay Kagawad nga ang bata ang residente sang Barangay Sincang Airport apang nagakadto lang sa iya paryente sa Barangay Vista Alegre.
Bulagay naman ang mga ginakanan sang bata.
Ginpatigayon ang turn-over sang sachets sang suspected shabu sa mga kapulisan sa Barangay Hall sang Barangay Vista Alegre kahapon nga hapon.
Nagpanugyan ang Barangay Kagawad sa mga pumuluyo sang Barangay nga mangin mabinantayon bangud ang illegal nga druga ang makaguba sa kabuhi sang mga kabataan.
Samtang ginpahayag naman sang station commander sang Bacolod Police Station 7 nga 11 ka sachets sang suspected nga illegal nga druga ang naturn-over sa ila.
Suno kay Police Captain Dax Santillan, Station Commander sang Bacolod Police Station 7, ginabanta nga yara sa kapin 5 grams ang ginapatihan nga illegal nga druga nga may standard drug price nga P34,000.
Suno kay Santillan, ipaidalom sa laboratory examination ang ginapatihan shabu kag imbestigaran man sang kapulisan kun sa diin naghalin ang mga suspected shabu nga yara sa paghinakop sang bata.
Mapatigayon man ini sang monitoring sa lugar kag kun makumpirmar ang impormasyon nga madata ang pagduso sang illegal nga druga, magapatigayon man sila sang drug buybust operation.
Gindayaw man sini ang effort sang mga Barangay Officials agud nga matapna ang paglapta sang illegal nga druga kag nagpanugyan man ini sa mga opisyales nga kun may makumpiskar nga illegal nga druga magtawag sa police agud nga maproseso sang insakto.
