Nagdangat na sa indi magnubo anum ka mga persona ang nadulaan sang kabuhi bangud sa makusog nga pag-ulan nga gintuga sang Habagat kag Tropical Cyclone Crising sang Martes suno sa National Disaster Risk Reduction and Management Council.
Sa anum ka mga reported fatalities, tatlo ang nagikan sa Northern Mindanao samtang nagarekord man ang Mimaropa, Davao kag Caraga regions sang tag-isa suno sa NDRRMC.
Duha ka mga indibidwal ang nagkalamatay matapos matumbahan sang puno ang ila balay sa Barangay Poblacion, Mambajao, Camiguin.
Ang isa ka fatality ang nareport sa Barangay Sto. Niño, Tubod, Lanao del Norte, sang natumbahan naman sang puno sang lubi ang isa ka balay.
Naigo man sang natumba nga kahoy ang isa ka lalaki nga motorcycle rider sa Barangay Matin-ao, Mainit, Surigao del Norte, nga gintunaan sang iya kamatayon.
Samtang, lima ka mga persona ang nareport nga pilason kag anum ka iban pa ang nagapabilin nga missing sa pila ka rehiyon.
