Nagsaka na sa 33 ang ginbawian sang kabuhi tuga sang epekto sang mga nakaligad nga mga bagyo kasubong man sang Southwest Monsoon ukon Hangin Habagat, santo sa Office of Civil Defense (OCD) kahapon.
Suno kay OCD Disaster Preparedness Service director Gregorio Tomas, 19 ka mga indibidwal ang pilason samtang tatlo naman ang nagapabilin nga missing.
Ginabug-usan sang 8.8 million ukon 2.5 million ka mga pamilya ang apektado sang panahon, partikular na sa Ilocos Region, Cagayan Valley, Central Luzon, Western Visayas, Zamboanga Peninsula, Calabarzon, Cordillera Administrative Region, Metro Manila, kag Mimaropa.
Sa apektado nga populasyon, 164,500 ka mga indibidwal ukon 46,900 ka mga pamilya ang temporaryo nga nagatinir subong sa 1,365 ka mga evacuation center.
Nahalitan man ang kapin 3,300 ka mga pamalay sa diin 2,900 diri ang partially damaged samtang 405 naman ang totally damaged.
Nakapaidalom naman sa state of calamity ang 117 ka mga ciudad kag banwa.
Naglab-ot naman sa P1.78 billion nga balor sang bulig ang nahatag sa mga apektado nga komunidad, santo sa OCD.
Samtang, nagpagwa naman sang 2.3 million ka family food boxes ang Department of Social Welfare and Development (DSWD) sa mga apektado nga komunidad LGUs kag may yara pa ini 3.5 million boxes nga nakahanda na para ipanagtag, kadungan sang iban pa nga relief supplies.
Santo naman sa Department of Health (DOH), 5,831 ka mga evacuees na ang ila na-akomodar kag nahatagan sang libre nga konsultasyon.
