Ginpasalamatan sang utod ni Leah Mosquera, ang Negrense caregiver nga napatay sa pag-atake sang Iran sa Israel, ang personal nga pagbisita ni Israeli Consul Moti Cohen sa haya sang ila nga utod.
Ang Consul ang nag-abot sa Bacolod-Silay Airport pasado alas-10:00 kaina sang aga kag ini ang nagcourtesy call kay Negros Occidental Governor Eugenio Jose “Bong” Lacson sa Provincial Capitol.
Nagpadulong man sa kapitolyo ang mga utod ni Leah, agud maghinun-anon sa Israeli official.
Gikan sa provincial capitol, ang opisyal ang nagderetso naman sa Municipal Hall sang banwa sang San Enrique agud magcourtesy call kay Mayor Jilson Tubillara antes nagpadulong sa haya sang Negrense Caregiver sa Barangay Guintoliran sang nasambitan nga banwa.
Sa interview sang Bombo Radyo Bacolod kay Mae Joe Mosquera, una na sini nga nameet si Akuni sa Manila.
Nagapasalamat ini nga personal ini nga nagbisita sa iya utod, kasubong man nagpasalamat sa tanan nga mga nagbulig sa ila.
Bangod sa mga nabatun nga bulig, sila ang wala na sang kabudlayan sa haya.
Kahapon, Hulyo 29, ginsaulog man nila ang ika-50 kuntani nga kaadlawan ni Leah.
Suno kay Mae Joy, nakaandan na nga nagapakaon si Leah sa iya kaadlawan kag nagahatag sang donasyon sa simbahan.
Apisar nga wala na ang ila utod, ginpadayun nila ang nakaandan sini paagi sa paghanda kag pagpatigayon sang misa.
Ginpalawig naman nila ang haya, bangod madamo ang nahidlaw kay Leah nga madugay man nga wala nakapauli sa Pilipinas, kag sang magpauli, mayami na nga bangkay.
Natalana ang lubong sa Agosto 16.
