Wala na sang kabuhi ang isa ka senior citizen sang nasapwan sa suba sang Sitio Lapuz, Purok 2, Barangay 3, Sipalay City, Negros Occidental sang Agosto 2, 2025 sang aga.
Ginkilala ang biktima nga si Alyas Hardelita, 77 anyos, kasado kag residente sang Purok Camatis, Barangay Mambaroto sa nasambit nga ciudad.
Sa interview sang Bombo Radyo Bacolod kay Police Lt. Cipriano E. Lumanog III, Deputy Chief of Police for Operation sang Sipalay City Police Station, sang Agosto 2 sang aga ang biktima ang nagapanglaba sa suba sang hinali lang ini nakadanlog kag nagtupa sa madalom nga bahin sang suba kag nalumos.
Nasapwan sang isa ka residente ang bangkay sang biktima nga nagakulob na sa higad sang suba kag gilayon nga nagtawag sang rescue team.
Gindala sa ospital ang biktima apang gindeklarar nga dead on arrival.
