Nag-atubang sa ikaduha nga imbestigasyon sang Senate Blue Ribbon Committee kahapon ang mga contractors sang maanomaliya nga flood control projects sa pungsod lakip na ang negosyante nga si Sarah Discaya.
Si Discaya ang tag-iya sang Alpha and Omega Gen. Contractors and Development Corporation, lakip na ang walo pa sini ka mga construction companies.
Sa nasambit nga hearing, daw kaangay nga nagpanghugas sang kamot si Discaya matapos ginpahayag nga siya ang nagdivest ukon nag-isol na sa pila ka mga construction companies.
Apang ginkwestiyon ni Senator Erwin Tulfo ang pahayag kag ginpamangkot kun ngaa siya ang nagapabilin bilang Chief Operating Officer (COO) kag ang iya asawa ang kabahin man sang operasyon.
Depensa ni Discaya, indi siya ang COO kundi Chief Financial Officer (CFO) kag indi man siya ang direkta nga nagamanage sa mga kumpaniya.
Apang pahayag ni Tulfo, kun matuod-tuod nga nagdivest ini, nga siya ang nagapabilin pa nga CFO.
Bangud diri, ginpatpat ni Senate President Pro Tempore Jinggoy Estrada ang siyam ka mga kumpaniya nga ginapanag-iyahan ni Discaya nga wala naman gindeny sang negosyante.
Samtang, daw indi naman makasabat ang tag-iya sang Wawao Builders sang siya ang ginpamangkot kun imbolbado sila sa mga ghost projects sa Bulacan.
Ang Wawao Builders, nga ginapanag-iyahan ni Mark Allan Arevalo, ang nalakip sa 15 ka mga contractors nga ginlawag ni President Ferdinand Marcos Jr. nga nakakuha sang dako nga bahin sang flood control contracts sang gobyerno.
Nagpangakig si Estrada matapos nga indi diretso nga masabat ni Arevalo ang simple nga pamangkot kun may yara sang ghost project ang ila kumpaniya.
Suno kay Arevalo, gin-abisuhan ini sang iya abogado nga indi maghambal agud indi magamit batok sa iya kun ano man nga mga tinaga ang magwa sa iya bibig.
Gin-abisuhan naman ini ni Committee Chairman Senator Rodante Marcoleta nga magbulig na lamang sa pagbuyagyag kun sin-o pa ang mga dapat manabat agud indi tuman kabug-at ang iya atubangon nga konsekwensya.
