Ginpasalig sang Bacolod City Public School Teachers Federation nga mangin transparent ang procurement sang health maintenance organization (HMO)-type benefits para sa mga manunudlo nga nagsulod sa group procurement.
Sa interview sang Bombo Radyo Bacolod kat Richard Gelangre, aminado ini nga ang Deparment of Education (DepEd) Central Office amo ang nakatuga sang confusion.
Ini bangod sila ang una nga nagpagwa sang guidelines sa una nga semana sang Agosto nga papilion ang mga manunudlo sa group procurement ukon individual availment sang ila nga annual medical allowance nga P7,000.
Gani ginpapili nila ang mga manunudlo, kag mayorya ang nagpili sang group procurement.
Apang sang malapit na lamang ang natalana nga disbursement sang budget, nagpagwa sang bag-o nga DepEd memo nga nagapahanugot sa pagpili sang bisan diin sa duha ka pamaagi.
Dugang pa sini nga una na nila nga ginhatagan sang P7,000 ang masobra 200 ka manunudlo nga may-ara na sang existing HMOs paagi sa ila asawa, bana ukon kabataan, rasun nga madamo ang naglain ang buot kag nagreklamo.
Bangod sa pagbag-o, ginhatagan sang allowance ni DepEd division of Bacolod City Superintendent Dr. Dennis Develos ang mga manunulod nga nagbag-o ang pinsar nga makasumiter sang sulat kag rasun sa pagsaylo sa individual availment.
Apang pahanumdom ni Gelangre nga bisan mabatun na ang P7,000 cash, ang mga manunudlo ang required nga magpangita sang HMOs nga may offer nga yara sa ginhatag nga standards.
Sarang naman personal nga makabakal sang mga bulong, apang ini ang para lamang sa mga may sakop nga geographically isolated areas, gani ini ang ma-implementar sa Negros Occidental, apang indi pwede sa Bacolod City.
Nagapati ini nga mas mahal ang pagbakal sang HMO kun individual sangsa grupo nga mahimo pa mabargain.
Dugang pa nga ginpasalig man ni Develos nga ang sobra nga kantidad, kun makabarato sa makuha nga HMO, ang ibalik man sa mga manunudlo.
Pasalig nila nga mangin transparent ang procurement process kag madamo man sila nga magatsekyar sa proseso sang bidding.
Seguruhon man nila nga ang makuha nga HMO ang naga-offer sang annual package, gani kun Setyembre 2025 makapatigayon sang bidding, Setyembre 2026 man ini maga-expire.
