Ginpahayag sang alkalde sang ciudad sang Bacolod nga may yara sang nagakaigo nga ebidensya gani ginpirmahan sini ang dismissal order sa isa ka manunudlo sang Bacolod City College bangud sa sexual harassment.
Sa interview sang Bombo Radyo Bacolod kay Bacolod City Mayor Greg Gasataya, nabaton sini ang reklamo kag gina-aktuhan nila ini.
Suno kay Gasataya ang ini nga tikang ang nagapakita lamang nga ang tanan nga reklamo nga ginapadala sa alkalde ang gina-aktuhan.
Madumduman ang complaint ang ginbatun sang Code of Discipline sang kolehiyo kag ginrekomendar sa Office of the City Mayor.
Apang antes gindesisyunan, ginpasa anay sang alkalde ang complaint sa Board of Regents sang BCC, kun sa diin ang alkalde man ang chairman.
Samtang matapos tun-an sang Board of Regents, ang alkalde gihapon ang magapagwa sang final decision.
Ginpagwa ni Mayor Greg ang desisyon nakaligad nga duha ukon tatlo ka semana.
Ginapahanumdom sang alkalde nga wala sang lugar para sa kaangay nga sexual harrasment kag ini ang indi dapat tolerahon partikular na sa sulod sang learning institution.
