UP Student Regent, ginkondenar ang gina-alegar “human rights violation” sa pagkapatay sang 19 ka NPA sa Toboso

Nagpagwa sang statement ang Office of the Student Regent sang University of the Philippines sa ginapahayag Human Rights Violation angot sa natabo nga engkwentro sa Brgy. Salamanca, Toboso, Negros Occidental nga nagresulta sa pagkamatay sang 19 ka mga myembro sang NPA.

Ang Student Regent ang nagarepresentar sang tanan nga estudyante sang University of the Philippines (UP) sa Board of Regents, ang highest governing body sang UP.

Ginpahayag sang talatapan nga na-document sang mga human rights local groups, media reports, kag mga pumuluyo ang natabo nga insidente sa nasambit nga lugar nga nagresulta sa pag-evacuate sang indi magnubo sa 653 ka mga indibidwal.

Ginkondenar sang mga ini ang nagapadayon nga militarization sa Negros Island sa idalum sang polisa nga ginpatuman paagi sa Memorandum Order No. 32, nga nagbutang sa rehiyon bilang “state of lawless violence”, nga nangin rason sa mas ginpasangkad nga pwersa sang Armed Forces of the Philippines (AFP) humalin pa sang 2018.

Suno diri, ang Negros ang nagapabilin nga isa sa pinaka-militarized nga lugar sa pungsod, nga may indi patas nga kadamuon sang ginreport nga mga extrajudicial killings.

Santo sa human rights reports, ginapahayag nga may yara sang mga kaso sang harrasment kag pagpamahog sa mga sibilyan lakip na ang mga mangunguma sa apektado nga lugar.

Suno diri, ang mga ini ang naga-angot sa madugay na nga injustices sa Negros, kalakip ang indi patas nga distribusyon sang kadutaan kag kapigaduhon sa lugar.

Nagapanawagan ang Office of the Student Regent sa hugot nga pagsunod sa International Humanitarian Law kag proteksyon sa komunidad kag ginahingyo man nga untaton na ang military operations.