Gindala sa ospital ang 11 anyos nga lalaki matapos magtoon sa sulod sang 14 ka oras sa Changsha, China.
Nahibaluan nga ang China strikto sa pagtoon kag kun kaisa nagakabutang sa risgo ang mga kabataan.
Kaangay na lamang sa 11 anyos nga bata nga lalaki nga gindala sa ospital matapos maghimo sang assignment halin alas-8:00 sang aga tubtob alas- 10:00 sang gab-i nga wala sang pahuway.
Bangod sini nag-eksperyensya ang bata sang kabudlayan sa pagginhawa, paglingin kag pagsakit sang ulo.
Ang mga ginikanan man ang naga-upod sa bata sa pagtoon kag sang natabo ang insidente gilayon nila gindala sa ospital ang bata nga nadiagnosed sa respiratory problems bangod sa hyperventilation.
Santo sa report madasig kag madalom ang pagginhawa sang bata bangod sa emotional stress tuga sang pressure halin sa iya mga ginikanan.
Apang, ini nga mga kaso masami na nga nagakatabo sa China bangod madamo sang mga menor de edad ang ginadala sa ospital bangod sa anxiety sa exam kag madugay nga paggamit sang cellphone.
