Nagdangat sa 381 ka indibidwal ang nag-evacuate bangod sa mga pagbaha nga nagluntad sa ciudad sang Bacolod.
Nahibaluan nga napaidalom sa Storm Signal No 1 ang Bacolod City bangod sa Severe Tropical Storm OPONG.
Sa interview sang Bombo Radyo Bacolod kay Bacolod City Disaster Risk Reduction and Management Office Chief Operation Officer Earl Edward Ramirez, 381 tanan ang mga indibidwal nga narecord nga nag-evacuate kun sa diin ang pinakamadamo amo ang evacuees sa Barangay Banago nga nagdangat sa 58 ka pamilya ukon 290 ka indibidwal.
Ang mga evacuees ang nagtinir naman sa Domingo Lacson National High School.
Samtang may 23 ka pamilya ukon 77 ka indibidwal naman nga bakwit sa Barangay Pahanocoy nga yara sa karun sa Medalla Elementary School; Duha kag pamilya ukon walo ka indibidwal sa Barangay Taculing nga yara karun sa community center; isa ka persons with disability (PWD) kag isa ka senior citizen sa Barangay 10 nga yara nagatinir sa Barangay Hall; kag duha ka senior citizen sa Barangay Cabug nga yara sa ila Barangay Health Center.
Suno kay Ramirez, padayun ang ila monitoring sa mga flood prone areas kag sang water level sa mga suba.
Ini bangod sa kahangawa nga liwat magsaka ang baha sa tion sang high tide ukon taob nga nag-umpisa ala-1:00 subong nga hapon.
Ang DRRMO ang nagpreparar naman sang food and non-food items nga ihatag sa mga evacuees.
Luwas sa pagbaha, may natumba naman nga dako nga kahoy nga nagbalabag sa dalan sa Barangay 27.
Sila ang gilayon man nga nagpatigayon sang pruning kag clearing agud malabayan ang dalan.
Nagalaom si Ramirez nga indi na madugangan pa ang kaangay nga insidente.
Pahanumdom sini sa mga nagapuyo sa flood prone areas nga indi na hulaton pa nga magsaka ang tubig antes mag-evacuate.
Kun may-ara sang luyag ma-evacuate pasalig sini nga ang DRRMO ang handa nga maghakot.
