Nasapwan ang bangkay sang isa ka lalaki nga naputos sa garbage bag kag ginapatihan ginhal-id sa irigasyon sa Prk Kapayas, Brgy Pacol, Bago City pasado alas-5:00 kaina sang aga.
Sa interview sang Bombo Radyo Bacolod kay Alyas Jeffrey, residente sa lugar, nabatian lamang sini ang impormasyon nga may ginhal-id nga bangkay, kag pag-abot niya makumpirmar sini nga tawo ang unod sang garbage bag nga naka-packing tape.
Ini ang nakumpirmar nga bangkay sang lalaki sa pagbukas sang Scene of the Crime Operation.
Suno kay Jeffrey, sa katupad nga Prk Langka nga konektado man sa dalan ang ginhal-iran sang lalaki nga ginputos man sang packing tape sang Hulyo 2.
Aminado si Jeffrey nga madulom ang area kag medyo malayo sa pamalay.
Madamo man sang exit point gikan sa lugar, kalakip ang La Carlota City, Pulupandan, Valladolid, Murcia, kag Bacolod City.
Pahayag naman ni Barangay Kagawad Rex Duco, ang tag-iya sang talamnan ang nakakita sang bangkay.
Gilayon sini nga ginpakumpirmar sa iban kun tawo gid man ang unod sang garbage bag, tubtob nga naglapta na ang impormasyon kag nakalab-ot sa ila sa Barangay Hall.
Wala naman sang missing sa ila nga Barangay, gani nagapati ini nga ginhal-id lamang sa lugar ang bangkay.












