Ginkumpirmar sang Assistant Regional Director sang Department of Public Works and Highways – Negros Island Region nga may tatlo ka District Engineer sa Negros Occidental nga ginpa-subpoena sang National Bureau of Investigation (NBI).
Apang paathag sini nga ang subpoena ang para lamang sa pagsumiter sang mga dokumento may kaangtanan sa flood control projects.
Nahibaluan nga kalakip sa ginpadal-an sang subpoena ang District Engineer sa District Engineering Office 2, 3 kag 5 sa Negros Occidental.
Sa interview sang Bombo Radyo Bacolod kay Engr Rodney Gustilo, sa paghangop sini, tanan nga District Engineer ang padal-an sang subpoena, gani mahimo nga may-ara pa sang mga masunod.
Ginapangayo sang NBI ang budget proposals sa National Expenditure Program kag General Appropriations Act halin 2021 tubtob 2025.
Suno diri, sila ang nagasumiter kada tuig sang proposed infrastructure projects sa kada distrito sa pagpatigayon sang Budget preparation.
Nakadepende naman sa Budget deliberation kun diin sa mga ginpropose nga proyekto ang aprubahan.
Paathag sini nga kun ano nga proyekto ang makasugtan, amo lamang ang ila regular nga ginahuman.
Apang may-ara sang insertions nga derekta nga ginapasulod sa mga District Offices kag wala na sa monitoring sang Regional Office.
Paathag ni Gustilo nga sang nakaligad, may ginpanaog nga memorandum sa DPWH nga indi magsabat sa mga pamangkot nga wala sang clearance gikan sa DPWH Central Office.
Apang sang damlag lang, nagpagwa man sang pronouncement si DPWH Secretary Vince Dizon nga nagahatag pahanugot sa pagkooperar sa imbestigasyon.
Nagapati ini nga magapadala sang kinahanglan nga dokumento ang mga ginsubpoena nga mga District Engineers.
Ginahatag man sini ang benefit of the doubt sa mga District Engineers nga nagpasalig nga wala sang ghost project sa Negros Island Region.
