Naga-wish kaman bala kun ikaw makakita sang falling star?
Apang matuman ayhan ang imo nga wish kun ang nakita mo nga nagakalayo nga nagtupa sa duta ang indi man gali bulalakaw?.
Napamatud-an nga kabahin lamang sang Starlink satellite ang isa ka ginpatihan nga meteor nga nagpasanag sa kalangitan sang Southern California kag Nevada sa Estados Unidos.
Suno sa American Meteor Society (AMS), nakabaton sila sang nagadangat sa 200 ka report natuhoy sa ginapinsar nga “fireball” ukon pagtupa sang meteorite sa duta, nga nakita halin sa San Francisco tubtob sa Reno, Nevada, mga alas 7:50 sang gab-i sang Huwebes, apisar nga wala man sang ginapaabot nga meteor shower nga magaluntad sa amo nga gab-i.
Sa pag-imbestigar, natumod sang AMS nga indi meteor kundi isa ka Starlink satellite nga nagapanumbalik sa kalibutan ang nakit-an sang mga pumuluyo.
Ang Aerospace Corporation, nga naga-monitor sang mga nagahulog nga satellite ang nagkumpirmar nga sila ang may ginapaabot gid man nga Starlink satellites nga magabalik sa atmosphere sang nasambitan nga gab-i.
