Nabatun na sang National Bureau of Investigation (NBI) – Bacolod ang mga dokumeto gikan sa tatlo ka District Engineers sang Department of Public Works and Highways sa Negros Occidental.
Sa interview sang Bombo Radyo Bacolod kay NBI Bacolod Agent William de Arca, isa sa case incharge, may anom ka District Engineering Offices sa Negros Occidental kag gintunga nila ang paghandle sini sa duha ka case agent agud mas matutukan.
Suno kay De Arca, sa karun, tatlo palang ang una nga ginpadal-an sang subpoena, apang padal-an man sa masunod ang nabilin.
Nahibaluan nga ginsubpoena ang mga District Engineers bangod sa una nga pagrequest sang NBI sang ila nga mga dokumento sa proyekto, partikular na sa mga flood control projects halin 2022 tubtob 2025, ang mga ini ang wala magcomply sa panindugan nga kinahanglan pa sang approval gikan sa higher office.
Ang una nga ginsubpoena ang ginalakipan sang mga District Engineers gikan sa Negros OccidentalDistrict Engineering Office 2, 3 kag 5.
Suno kay De Arca, ang mga dokumento nga ginsumiter ang icross-match nila sa mga dokumento nga nakuha sa website sang DPWH tuhoy sa mga proyekto.
Nahibaluan nga ang mga District Engineering Office ang nagasumiter sang mga proyekto nga luyag ipatuman kada tuig sa balor nga P5 billion, ini ang ipasaka sa DPWH Central Office, apang magadepende sa mga Kongresista kag Senador kun ano nga mga proyekto ang aprubahan kag malakip sa National budget.
Suno kay De Arca, matapos ang cross-matching, tsekyaron nila isa isa ang mga proyekto kun ini ang naga-eksister kag kun ano na ang status.
Paathag sini nga ang NBI ang ginmanduan sang Department of Justice sa pag-imbestigar sa anomalya, kag sila ang magapadala sang rekomendasyon matapos ang imbestigasyon.
Ang resulta sa imbestigasyon ang ginalantaw man nga ihatag sang DOJ sa Independent Commission for Infrastructure (ICI).
