Ginpapauli na ang mga fire personnel nga gin-augment agud magbulig sa mga nahalitan sang 6.9 magnitude nga linog sa Cebu.
Sa interview sang Bombo Radyo Bacolod kay Bureau of Fire Protection Region 7 Director Fire Chief Superintendent Fred Trajeras, gikan sa Negros Occidental siya ang nasaylo bilang Regional Director sang Eastern Visayas sang Hulyo 15.
Kaina sang aga, nagpatigayon na sila sang close out ceremony ukon opisyal nga pagtapos sang augmentation sang walo ka BFP Regional Offices.
Suno kay Trajeras, ang BFP-Negros Island Region ang pinakauna nga nagbulig nga ginsundan sang Region 5, 6, 8, 9, 10, BARMM kag Caraga.
Suno diri, nagdangat sa 70 ang mga napatay bangod sa pagtay-og.
Gin-untat na ang search and retrieval operations kag sa karun nakafocus na sa relief operations.
Yara sa 475 ang BFP personnel sang Region 7, samtang nagdangat naman sa 137 ang mga gin-augment nga BFP forces gikan sa lainlain nga rehiyon, kag 27 ka volunteer fire brigade.
Sa masami, naga mato-mato na lamang pauli ang mga BFP forces matapos sang mga operasyon, apang bilang pagkilala sang bulig sang iban nga rehiyon, ginpatawag niya ang mga ini sa BFP Region 6 headquarters para sa clock off ceremony.
Suno diri, pabalikon na ang mga BFP forces bangod sila ang mahimo kinahanglanon man sang ila rehiyon.
Wala naman nagakahulugan nga natapos na ang pagserbisyo sang BFP, bangod sila sa BFP-Region 7 ang magapadayun sa pagbulig sa relief operations kag iban pa nga mga mahimo magluntad nga emerhensya.
Luwas sa mga naka-check in sa ila incident command post, may iban pa mga volunteer fire brigade nga nagbulig.
