Ginpasiguro ni NBA Commissioner Adam Silver nga wala sang plano ang liga nga pahalinon ang All-Star Weekend sa bag-o nga arena sang Los Angeles Clippers bisan pa nga may nagapadayon nga imbestigasyon kun naglapas ang team sa salary-cap rules may kaangtanan kay Kawhi Leonard.
Nagsugod ang imbestigasyon sang natalikdan nga bulan matapos ginreport sang journalist nga si Pablo Torre ang tuhoy sa alegasyon sang 28 million dollar “no-show” endorsement deal ni Kawhi Leonard kag sang Aspiration Fund Adviser LLC, isa ka kompanya nga nakabase sa California nga nagdeklarar sang bankruptcy sini nga tuig.
Madumduman nga nag-invest si Steve Ballmer nga tag-iya sang Clippers sang 50 million dollars sa Aspiration samtang ang iya grupo ang may 300 million dollars partnership deal man sa amo nga kompanya sang Setyembre, 2021.
Ang NBA ang ginalantaw nga mahimo magpanaog sang multa nga tubtob 7.5 million dollars, pagkanselar sang kontrata, kag pagkuha sang mga masunod nga draft picks sang team kun mapamatud-an nga sila ang may paglapas sa salary-cap rules.
