Nagapanawagan ang mga rice farmers sa Negros Occidental nga mabutangan sang floor price ang baklanay sang humay.
Sa interview sang Bombo Radyo Bacolod kay Beltran Villanueva, farmer kag rice retailer sa Burgos Public Market, apisar sa ginpatuma nga importation ban sa bugas, wala man nagsaka ang baklanay sang fresh palay sa baylo padayun pa nga nagasarurot panaog.
Suno diri P12 ang baklanay sa karun sang kada kilo sang humay, kag nagapanaog pa sa P10 para sa tig-a nga variety.
Una na suno diri nga naggwa ang impormasyon nga butangan sang floor price nga indi pwede magnubo sa P17 ang pamakal, apang tubtob sa karun wala man mapatuman.
Suno kay Villanueva, halos P500 nalang ang bili sang isa ka sako nga buhinan pa sang bayad sa hauling.
Madamo naman sang wala na liwat nagtanom matapos makapaani.
Suno kay Villanueva, natalana nga anihon ang iya humay sa katapusan sang Oktubre, kag matapos sini, plano na lamang niya nga ipa-arendo ang duta sa nagatanom sang sandiya.
Pahayag sini nga tuman na ang ila pamiyerdihan ilabi na nga mahal ang abono, pesticide kag insecticide.
Nagapati ang mangunguma nga mahimo magpanaog pagid ang presyo kaagay sa Luzon nga nagpanaog na sa P8 kada kilo.
Pahayag pa sini nga sa karun mas luyag sang mga manug-ani nga magtrabaho na lamang sa construction.
Suno kay Villanueva, wala na sang magabato sa nakaandan nga ginabayaran lamang sang humay, kag sa karun sila ang kinahanglan nagid magsweldo sang P400 kada adlaw, nga dugangan pa sang libre nga plete, pamahaw kag panyaga.
Wala man sila sang mahimo kundi magsunod sa demand sang mga manug-ani bangod wala sang magarab sang ila humay kun indi magpasugot.
