Partially damage ang isa ka structure nga ginapanag-iyahan sang Negros Metal Corporation matapos masunog sa Bangga Metal, Barangay Alijis, Bacolod City, subong nga gab-i.
Sa interview sang Bombo Radyo Bacolod kay Fire Officer 2 Anthony Val Isansa, Fire Arson Investigator sang Bacolod City Fire Station, nagwalk-in sa Alijis Fire Substation si Mr. Michael Ken Ledesma nga nagpahibalo nga may yara sang nagluntad nga sunog sa nasambit nga lugar.
Gilayon man ginrespondehan sang fire personnel kag nag-abot sila sa fire scene alas 7:49 subong nga gab-i.
Gindeklarar nga fire under control alas 7:59 kag fire out alas 8:00 ang takna subong nga gab-i.
Nagdangat sa first alarm ang nagluntad nga sunog.
Suno kay Isansa, santo sa ila nga imbestigasyon, ang kalayo ang nagsugod sa kawa nga ginagamit nila sa pag-init sang gear.
Ang gear ang ginasulod sang mga empleyado sa oven kag kun mag-init na ginatusmaw nila sa tubig nga yara sa kawa kag ginabutangan sang lubricant oil agud nga dugang ang pagtig-a sang metal.
Bangud gamay ang kawa kag dako ang gear nagdasig ang flash point bangud man sa kulang nga lubricant oil.
Ang lubricant oil ang nagtuga man sang madamol kag maitom nga aso.
Natapna man gilayon ang kalayo kag wala na naglapta sa iban pa nga structures.
Nagbilin ang sunog sang P4,000.00 nga balor sang damages.
Wala man sang nasamaran sa nagluntad nga sunog.
