Patay ang isa ka 19-anyos nga lalaki matapos makabunggo ang ginamaneho sini nga motorsiklo sa trailer truck sa National Highway, Hacienda Bariw, Barangay Sta. Teresa, Manapla, Negros Occidental sang ala-1:45 kahapon sang hapon.
Sa imbestigasyon sang Manapla Municipal Police Station, ang Prime Mover truck ang ginamaneho ni alias Reynaldo, 52-anyos, kasado, residente sang Sitio Macabal-ong, Magsaysay, Cadiz City, samtang ang motorsiklo naman ang ginamaneho ni alias Samuel, 19-anyos, residente sang Sitio Sangay, Barangay Purisima, Manapla.
Sa interview sang Bombo Radyo kay Police Major Robelito Mariano, hepe sang Manapla Municipal Police Station, ang truck ang nagabiyahe halin sa Cadiz pakadto sa Manapla kag nagliko pakadto sa Lopez Transloading Compound sang aksidente ini nga nabungguan sang motorsiklo nga magapadulong naman kuntani sa Cadiz.
Suno sa imbestigasyon, madasig ang pagpaladagan ni Samuel sang motorsiklo kag bangod sa impact ini ang nagdasok sa idalom sang truck.
Si Samuel ang nag-agom sang pilas sa ulo kag lawas nga ginhingagaw pa dala sa Northland Hospital, apang gindeklarar nga dead on arrival (DOA).
Ang driver sang Prime Mover nga si Reynaldo yara na sa kustodiya sang Manapla Municipal Police Station, samtang padayon pa nga ginahibalo sang kapulisan ang kabug-usan nga detalye sang insidente.
