Nag-offer sang reward nga P100,000 ang Bacolod City Government sa makahatag sang impormasyon nga makabulig sa pagsolbar sang krimen sa pagpatay sa 17 anyos nga babayi nga nasapwan sa kahilamunan sa Barangay 12, Bacolod City kahapon sang hapon.
Madumduman nga nasapwan kahapon sang hapon ang bangkay ni Freya Go, 17 anyos nga nakabaklid, may gapos ang kamot kag wala na sang pang-idalom nga panapton.
Sa interview sang Bombo Radyo Bacolod kay Bacolod City Mayor Greg Gasataya, ginakondenar sang ciudad ang kaangay nga mga krimen kag nagalaom ini nga sa pagtanyag sang P100,000 nga reward magakooperar ang mahimo may ihibalo sa krimen.
Aminado ang alkalde nga may tion nga ang may ihibalo ang natahap manugid bangod sa kahadlok nga mabulgar ang ila identity.
Pasalig ni Mayor Greg nga protektahan sang mga ini ang identity sang makatudlo sa suspect, kag ang mga ini ang mahimo man nga magpalapit sa media kaangay sa Bombo Radyo Bacolod.
Samtang ginatugyan naman sini ang imbestigasyon sa Bacolod City Police Office, nga naga-update man sa iya sang investigation report.
