Nagsugot na ang iloy sang 17 anyos nga dalagita nga nasapwan patay sa kahilamunan nga bahin sang Barangay 12, Bacolod City kahapon nga mapaidalom sa autopsy ang bangkay.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, nasapwan kahapon sang hapon ang bangkay ni Freya Go, 17 anyos nga nakabaklid, may gapos ang kamot kag wala na sang pang-idalom nga panapton.
Kagab-i nakig-angot naman sa ila ang iloy sang dalagita kag nagsugot nga ini ang ipaidalom sa autopsy examination subong nga adlaw.
Sa ila imbestigasyon, si Freya ang natumod nga duha ka bulan na nga trainee sa construction firm nga nagabaligya sang construction supplies.
Suno sa mga katrabaho sini, si Freya ang naglisensya nga magabakal sang kalan-on sang Martes kapin alas-5:00 sang hapon apang ini ang wala na makabalik.
Ang kapulisan ang padayun man sa karun nga nagatipon sang mga CCTV footages sa mga bodega malapit sa kun sa diin nasapwan ang bangkay, nga mahimo nakakuha sa paglabay sang mga suspect.
Kasubong man ang mga CCTV footage sa lugar kun sa diin ini ulihi nga nakita kag mahimo padulungan.
Ginalantaw ni Depasucat ang posibilidad nga mahimo may ginkadtuan ang dalagita ukon ini ang may gintabo.
Luwas diri, tsekyaron man nila ang background sang pamilya sa pagtumod sang iban pa nga mahimo motibo sa krimen.
Ginalantaw ni Depasucat nga mahimo isa tubtob duha ang suspect sa pagpatay kag mahimo paghimulos sa biktima.