Magabayanihan ang mga pumuluyo sa Barangay Mailum, Bago City agud malimpyuhan ang ila mga atop kasunod sang pag-ulan sang abo matapos ang minor explosive eruption sang Bulkan Kanlaon kagab-i.
Sa interview sang Bombo Radyo Bacolod kay Joseph Hermogenes, Purok President sang Prk Kamotehan 2, Brgy Mailum, bag-o lamang sila natapos sa panyapon kagab-i kag nagahigda na para magtulog sang maglupok ang Bulkan.
Suno diri, nakabati sila sang ulan, apang kaangay nga may lain sa lagatik sini sa atup gani naggwa si Hermogenes kag ginsalod ang mga palad.
Didto lamang sini nahibaluan nga indi tubig ang nagatupa sa ila kundi abo.
May-ara man sang makadali nga pag-ulan apang ini ang wala gid makawash-out sang abo sa mga atop sang pamalay.
Gani sila ang magabululigay man sa pagpaninlo subong nga aga.
Sang gab-i, nagtanyag man ang ila Punong Barangay nga manghatag sang facemask apang bangod kadam-an ang nagatulog na, nadesisyonan nga sa aga na lamang patigayunon ang pagpanagtag.
Libuton man sini ang mga nasakupan agud matumod kun may-ara sang nagakinahanglan sang bulig.
