Napulo ka mga Barangay sa Bago City ang nagreport nga naka-eksperyensya sang ashfall kasunod sang paglupok sang Bulkan Kanlaon kagab-i.
Sa interview sang Bombo Radyo Bacolod kay Ryan Valero, operations and warning head sang Bago City Disaster Risk Reduction and Management Office, padayun ang pagbuga sang abo kag aso sang Bulkan Kanlaon apang wala na nasundan ang paglupok kagab-i.
Wala man sang evacuees sa Bago City apisar nga 10 ka Barangay ang gintup-an sang abo.
Ang apektado sang ashfall ang ginlakipan sang Brgy Mailum, nga amo ang pinaka-nahalitan, Brgy Ma-ao, Ilijan, Bacong, Abuanan, Dulao, Tabunan, Don Jorge Araneta, Taloc kag Binubuhan.
Suno kay Valero, wala sang sakop sang Bago City nga yara sa sulod sa 4km permanent danger zone, sa baylo yara lamang sa sulod sang 6km extended danger zone nga indi man kinahanglan mag-evacuate bangod nagapabilin sa Alert Level 2 ang status sang Bulkan.
Pasalig sini nga sila ang nagakoordinar sa Philippine Institute of Volcanology and Seismology (Phivolcs), samtang nakapreparar man ang ila response team partikular na sa Brgy Mailum kag Ilijan inkaso mag-escalate ang aktibidad sang Bulkan.
Sila ang nagpadala naman sang 2 ka water tanker agud mahatagan sang mainom nga tubig ang mga pumuluyo bangod apektado sang abo ang ila nga water source.
Panawagan naman ni Valero sa mga pumuluyo nga importante nga preparado ang pamilya kag makapreparar na sang mga go bags, hibaluon ang alagyan, kag magkoordinar sa barangay inkaso may magluntad nga emerhensya.
