Preparado na ang Bacolod City Police Office (BCPO) sa ila nga security deployment para sa UNDAS 2025.
Sa interview sang Bombo Radyo Bacolod kay BCPO Spokesperson Police Lt. Meller Dionio, sila ang may security deployment plan kag magasugod ang pagbantay sang kapulisan halin Oktubre 29 tubtob sa Nobyembre 2.
May mga kapulisan nga idispatch para sa tanan nga public kag private cemetery sa ciudad sang Bacolod.
Luwas sa mga sementeryo, may ideploy man nga mga kapulisan sa mga bus terminal kag ports bangod sa ginalauman nga madamo nga byahero.
Kaupod man sang Philippine National Police ang nagkalainlain nga ahensya kaangay sang Bureau of Fire Protection kag Bacolod City Disaster Risk Reduction and Management Office agud maseguro ang kalinong sa mga nagabisita sa minatay.
Pahanumdom ni Dionio nga ginadumilian sa mga patyo ang pagpanahor, pagdala sang makahulubog nga ilimnon kag mga deadly weapons.
Panawagan sini sa publiko nga magkooperar sa mga otoridad kag sundon ang mga pagpatuman subong nga UNDAS 2025.
