May-ara sang 12 oras nga power outage bwas sa mga areas nga konektado sa Bacolod-Silay 69kv line sang Negros Electric and Power Corporation (NEPC).
Sa interview sang Bombo Radyo Bacolod kay Engr. Leomel Tambanillo, assistant Vice President for planning and business operation sang Negros Power, magapatigayon sang power outage halin alas-6:00 sa aga tubtob alas-6:00 sa gab-i.
Ini bangod sa natalana nga pagkonekta sa Grid sang Citicore solar plant sa Brgy Lopez, Silay City nga kabahin sang renewable efforts sang pungsod.
Medyo may kalawigon ang brownout bangod itakod pa ang mga equipments para sa transmission.
Tatlo ka substations ang apektado nga ginalakipan sang Talisay Substation, Lopez Substation kag Panaogao Substation nga may-ara sang 45,000 nga consumers.
Apang bangod sa isa ka tuig nga effort sa pagpapag-on sang transmission line, ang apektado ang napanubo nila sa 17,000 paagi sa pagtransfer sang linya sang iban nga mga konsumedor sa indi apektado nga substations.
Ang Negros Power ang nakacomply man sa requirements sang Energy Regulatory Commission (ERC) nga dapat napahibalo sa publiko ang scheduled power interruptions tatlo ka adlaw antes sang pagpatuman, paagi sa pagpost sa ila facebook page.
