Nagdangat sa 13 ang napatay bangod sa paglaslas sang Bagyo TINO sa Negros Occidental.
Lakip diri ang naanod nga balay sa kilid sang suba sa Purok Kamansi, Brgy Ma-ao, Bago City nga gin-anod sang tubig.
Kun sa diin upod sa naanod ang pamilya nga may siyam nga miyembro, kun sa diin duha ang nasapwan na nga wala sang kabuhi, samtang nagapabilin nga missing ang anom.
Ang nasapwan amo ang iloy nga si Jennilyn Sinoro kag ang iya bata nga si Joy Sinoro.
Apat naman ang narecord nga napatay matapos maanod sa suba ang ila mga balay sa banwa sang La Castellana.
Ang mga nasapwan nga bangkay ang gikan sa Brgy Robles kag Brgy Sag-ang sa nasambit nga banwa.
Samtang may 14 pa nga nagapabilin nga missing.
May tatlo man ka bangkay sang babayi nga nasapwan sa matapos malumos sa San Carlos City.
Ang isa ka bangkay ang nasapwan sa higad sang baybayon sa Purok Galicia, Brgy 5 samtang ang duha ang nasapwan naman sa Maglunod river sa Sitio Lumampag, Brgy Quezon nga lunsay ginapatihan nga nalumos.
May nasapwan man nga duha ka tuig nga bata sa Brgy Iglau-an, Murcia kag isa ka wala pa makilal-an nga bangkay sang lalaki sa Brgy Lopez Jaena, Murcia nga lunsay nakita sa bahin sang Bago river.
Napatay man ang pito ka tuig nga bata nga lalaki matapos matumbahan sang puno sang duldol ang ila balay, samtang ginabulong pa sa ospital ang iloy kag manghod sang napatay.\
Suno kay Governor Eugenio Jose “Bong” Lacson, may isa pa nga nareport nga casualty gikan naman sa La Carlota City.
