Nakagwa na ang Typhoon TINO sa Philippine Area of Responsibility alas-12:30 kaina sang kaagahon.
Ang Bagyo ang nagbaskog pa samtang yara sa West Philippines Sea sa 265 km North Northwest sang Pag-asa Island, Kalayaan, Palawan kag nagahulag sa kadasigon nga 35 km/h.
Dala sini ang kabaskugon sang hangin nga nagadangat sa 155 km/h kag pagmadlos nga tubtob 190 km/h.
Sa karun ang Kalayaan Islands na lamang ang nagapabilin nga yara gihapon sa Tropical Cyclone Wind Signal no. 1.
Ang Bagyo nga may International Name nga KALMAEGI ang padulong na sa karun sa Central Vietnam, nga ginalauman man nga magahuyang antes maglandfall sa masunod nga 24 oras.
Samtang nagbaskog na sa Tropical Storm category ang ginamonitor nga bagyo sa gwa sang PAR.
Ang Tropical Storm FUNG-WONG ang ulihi nga nasiplatan sa 1,715 km sa nasidlangan sang Northeastern Mindanao.
Dala sini ang kabaskugon sang hangin nga nagadangat sa 65 km/h kag pagmadlos nga tubtob 80 km/h.
Ini ang nagahulag padulong sa naaminhan-nakatungdan nga dereksyon sa kadasigon nga 20 km/h.
Ginalantaw nga magasulod sa PAR ang Bagyo bwas sa gab-i ukon sa Sabado sang kaagahon, bilang isa ka Severe Tropical Storm.
Ini ang hatagan sang Local Name nga Bagyo UWAN.
Sa karun indi pa matumod gid ang track sang Bagyo apang mataas ang posibilidad nga ini ang magalandfall sa Northern ukon Central Luzon sa Lunes.
Ginalantaw man nga malab-ot sang Bagyo ang Typhoon category bwas kag Super Typhoon category sa Domingo, gani ini ang mahimo nga Super Typhoon sa iya nga paglandfall.
