Apisar sa pagkasunog sang 11 ka mga balay sa Prk Riverside, Brgy Banago, Bacolod City alas-8:50 kagab-i, wala nasunog ang mga bibliya sang isa ka pastor nga yara sa ila kwarto.
Nahibaluan nga sa 11 ka balay nga apektado, walo ang totally damaged samtang tatlo naman ang partially damaged.
Sa interview sang Bombo Radyo Bacolod kay Pastor Joshua Sioting kag sa iya asawa nga si Jogelyn, nabatian nila sa likod nga balay ang iloy nga naglisensya sa iya kabataan nga ini ang magabakal sang sud-an.
Naga-amag pa ang bata nga mag-upod apang wala ginpa-upod, samtang sa pagbalik sang iloy nabatian nila nga nagsinggit ini nga may sunog.
Paglantaw nila sa bintana, dako na ang kalayo gani ginhingagaw na lamang salbar sang mag-asawa ang ila mga totoy.
Ginbalikan pa sang pastor ang ila dako nga ido nga nabilin sa balay, gani wala na sila nakasalbar pa sang iban nga kagamitan.
Sa pagbalik sa nasunog nga balay, nasaksihan nila nga apisar sunog na ang kwarto, wala gid malab-ot sang kalayo ang iya nga mga bible kag iban pa nga kagamitan sa simbahan.
Apisar sa trahedya, yara gihapon ang yuhom sa pila ka mga pumuluyo nga nasunogan.
Sa interview sang Bombo Radyo Bacolod kay Mark John Alabado, upod sini sa balay ang iya magulang nga babayi kag bayaw.
Wala man sila sang masalbar nga gamit matapos masunog ang ila balay.
Apisar sa trahedya, si Mark John ang makita nga nagakadlaw pa upod sa mga abyan sini nga nasunugan man, bangod suno sa iya wala naman sila sang mahimo sa natabo kundi ini ang batunon.
Pahayag sini, nga himuson na lamang nila ang nasunog nga balay kag mga pagkabutang, kag wala na nila ginpadalman pa ang naeksperyensya nga trahedya.
