Dutayan lamang malapakan sang pickup ang isa ka senior citizen sa intersection sang Burgos-Hilado Street sa Bacolod City.
Sa interview sang Bombo Radyo Bacolod kay Alyas Totong, nagapataya Small Town Lottery (STL) sa lugar, nagtabok ang senior citizen nga si Alan Noble sa tunga sang duha ka salakyan nga mahinay ang dalagan.
Apang wala sini matalupangdan nga may kalat nga naga-angot sa duha ka salakyan bangod ini ang ginaguyod.
Gani ginsalakay sang tigulang ang kalat kag ini ang natumba kag nalampos ang ulo sa semento.
Dutayan lamang malapakan sang nawala nga panguna nga goma sang ginaguyod nga salakyan ang ulo sang biktima, kag ginapakamaayo ni Totong nga ini ang nakita sang driver kag nakahingagaw nga makaprino.
Nagdugo naman ang agtang ni Noble bangod pakulob ini sang nalampos sa semento.
Sa pag-interview sang Bombo Radyo Bacolod sa senior citizen, indi sini madumduman kun ano ang natabo.
Ginpamangkot pa sini kun siya ang nagadala sang motorsiklo sang maaksidente, bangod ini ang wala gid sang may madumduman.
Suno sa iya, maayo naman ang iya pamatyag apang nagapalanakit lamang ang kalawasan.
