Ginpaidalom na sa State of Calamity ang ciudad sang Bacolod bangod sa kahalitan nga gintuga sang Bagyo TINO.
Sa interview sang Bombo Radyo Bacolod kay Councilor Atty Caesar Distrito, acting Vice Mayor sang Bacolod City, sila ang nagpatigayon sang special session alas-2:00 subong nga hapon agud desisyonan ang request ni Bacolod City Mayor Greg Gasataya sa deklarasyon.
Ang request sang alkalde ang nakabase man sa rekomendasyon sang Bacolod City Disaster Risk Reduction and Management Office.
Suno kay Distrito, importante ang deklarasyon sang State of Calamity, bangod paagi sini mafreeze ang presyo sang mga balaklon.
Pahayag sini nga may mga namonitor na nga gingamit ang sitwasyon agud makapamintaha paagi sa pagpasaka sa ila nga mga presyo.
Ang nasambit nga buluhaton ang unfair suno sa konsehal, bangod ginapaantos nagid ang mga nagapangatubang na ngadaan sang kalamidad.
