Wake-up call na para sa Bacolod City Water District Incorporated (BACIWA) – Prime Water kag mga telecommunication companies ang mga kahalitan nga gintuga sang Bagyo TINO suno sa konsehal sa Bacolod City.
Sa interview sang Bombo Radyo Bacolod kay Councilor Atty Caesar Distrito, acting Vice Mayor sang Bacolod City, may mga nadihon na nga resolusyon kag mga napasar nga ordinansa nga nagapanawagan sa BACIWA Prime Water subong man sa mga telecommunication network sa pagpreparar sang mga generator sets.
Ini bangod sang tinalikdan, natalupangdan na nga sa tion nga may brown-out nagaka-utod man ang serbisyo sa tubig kasubong man ang signal sa mga telecom networks.
Ini bangod sila ang nagasalig lamang sa kuryente gikan sa Negros Electric and Power Corporation.
Suno kay Distrito, sa sitwasyon sa karun nga malawig nga indi makabalik ang kuryente bangod sa kahalitan sang Bagyo, indi dapat nga hulaton pa kun san-o makabalik ang kuryente bangod tuman ka importante ang tubig sa pang-adlaw adlaw kasubong man ang internet kag mobile connections.
Suno diri, dapat nga may generator sets agud nga tayuyon ang paghatag sang serbisyo, kag indi na paghulaton pa ang masunod nga kalamidad antes maghulag.
