Tinguhaan anay nga marepair kag mangin passable ang mga taytay nga naapektuhan sang Bagyo TINO sa Negros Island antes ang pagpatuman sang rehabilitation kag recovery plans.
Sa interview sang Bombo Radyo Bacolod kay Office of the Civil Defense – Negros Island Region Director Donato Sermeno III, madamo sang mga taytay nga naguba bangod sa Bagyo TINO.
Lakip sa mga nabisitahan sa pagpadulong nanday Tourism Secretary Cristina Frasco kag Education Secretary Sonny Angara ang mga naguba nga taytay sa banwa sang Binalbagan, La Castellana kag Moises Padilla kun sa diin apat gid ang naguba nga suspension bridge partikular na ang nagakonekta sa Brgy Inolingan kag Magallon proper.
Sa paghinun-anon sini sa Department of Public Works and Highways, may marching order naman sa temporaryo nga pagrepair sang mga taytay agud nga mangin passable.
Matapos ang pagpatigayon sang Post-Disaster Needs Assessment (PDNA) amo na makapatigayon sang rehab and recovery plan gikan sa Bagyo TINO.
