Natigayon nga ma-rescue ang isa ka mangingisda sang Barangay Caliling, Cauayan, Negros Occidental nga wala makapauli humalin sang magpalawod sang Nobyembre 13.
Sa interview sang Bombo Radyo Bacolod kay Barangay Kagawad Erlinda Dorimon sang Barangay Caliling, ang mangingisda nga si Jolito Cario ang nagpanagat kag ginalauman nga ini ang magapauli sang November 15 bangud duha lang kaadlaw ang dala sini nga balon.
Nag-umpisa sila sa pagpangita sang November 15 kag ginpahibalo man sang Barangay Kagawad ang Philippine Coast Guard substation sa Cauayan.
Nagpadayon ang ila pagpangita sang November 16 tubtob 17 kaupod ang Philippine Coast Guard, team nga ginhuman ni Cauayan Mayor John Rey Tabujara kag Bantay Dagat kun sa diin nakadangat sila sa Anini-y, Antique kag Hinobaan apang wala sang balita ukon impormasyon angot kay Cario.
Kahapon sang aga, ginpahibalo sila sang Philippine Coast Guard nga nasagop sang lansa nga may pangalan nga Jade nga gikan sa Barangay Cartajena, Sipalay City si Cario.
Gilayon man nila ini nga ginsugat kag ginkuhaan sang vital signs, kun sa diin nakita nga mataas ang blood pressure sang biktima.
Gindala nila si Cario sa Cauayan District Hospital agud nga madapatan sang nagakaigo nga pagbulong.
