Nagpanawagan ang Bayan Muna nga indi na pag-untatan kag ipadayun ang mga pagprotesta batok sa kurapsyon.
Ini bangod systema ang kurapsyon kag bilang solusyon dapat mabag-o ang systema.
Sa interview sang Bombo Radyo Bacolod kay Bayan Muna Chairman Atty Neri Colmenares, ginkakibot sang madamo ang rebelasyon ni Senator Imee Marcos sa paggamit sang illegal nga droga sang iya utod nga si President Ferdinand “Bongbong” Marcos Jr.
Apang suno diri nagapabilin ang kamatuoran nga ginboto sini ang manghod sang 2022 Elections apisar nga nakahibalo sang matuod.
Pahayag pa sini nga kwestyonable ang plataporma sang Presidente sa pag-away sa illegal nga droga, kun matuod nga siya mismo ang nagagamit man.
Suno kay Colmenares, wala ini sang labot sa personal nga away sang mag-utod, bangod ang ila nga ginaduso amo ang solusyon sa kurapsyon.
Panawagan sang Bayan Muna sa mga pumuluyo lakip na sa mga Negrense, nga pabaskugon pa ang protesta kag updan ang tanan nga rally kag mga forums.
Pahanumdom sini nga ang kwarta nga ginkawat sang mga kurap ang kwarta sang Pilipino, pro-Marcos, pro-Duterte ukon Pro-Leni ka man.
Sin-o man ang partido sa politika, panugyan ni Colmenares nga dapat ipa-iway bangod ang nakataya diri amo ang puturo sang mga kabataan kag palaabuton sang pungsod.
Suno diri, sa pagkawat sang hundreds of billions sa kaban, ang gobyerno ang padayun man nga nagapangutang agud ini ang matabunan.
Gani nagsaka na sa P17.3 trillion ang utang sang gobyerno, nga katumbas sang utang nga P154,000 kada Pilipino.
Suno diri, ang mga kurap ang nagpangawat kag ginsulod sa ila mga bulsa apang tanan nga Pilipino ang nagabayad.
Pahanumdom ni Colmenares nga natabo na ini sadto sang 2013 kun sa diin nakapapriso sang tatlo ka Senador, apang nagbalik lamang.
Gani panawagan sang Bayan Muna nga indi untatan ang mga pagprotesta tubtob mabag-o ang systema, kag indi makontento sa pagkapriso lamang sang pila ka politiko.
