Nangin 3rd runner up ang kandidata sang Pilipinas nga si Ahtisa Manalo sa coronation sang Miss Universe 2025.
Ang pageant finals ang ginpatigayon kaina sang aga, oras sa Pilipinas kun sa diin 120 ka mga kandidata gikan sa nagkalainlain nga pungsod ang nagpasundayag sa Impact Muong Thong Thani Arena sa Bangkok, Thailand.
Gindeklarar naman nga Miss Universe 2025 si Fatima Bosch sang Mexico.
Samtang 1st runner up naman si Praveenar Singh sang Thailand, 2nd runner up si Stephany Abasali sang Venezuela, kag 4th runner up si Olivia Yace sang Cote d’Ivore.
Sa 1st part sang Question and Answer Portion, ginpamangkot kay Ahtisa ang mangin kontribusyon sini sa katawhan bilang global ambassador ukon bilang pumuluyo.
Pahayag sini nga luyag niya mangin paglaom para sa tawo.
Suno sa Beauty Queen, gikan ini sa pagka-imol kag nagsugod sa pageant sa edad nga 10 ka tuig kag siya ang nagpa-eskwela sa kaugalingon kag nagtinguha nga mapabangon ang pamilya gikan sa kapigaduhon.
Luyag sini mapakita sa Universe nga kun paano ini nagpadayun kag nakatindog na sa Miss Universe stage.
Sa 2nd part sang Q&A, parehas naman ang pamangkot para sa lima ka kandidata, sa kun paano nila gamiton ang Miss Universe platform sa pag-empower sang mga pamatan-on nga babayi kun sila ang makakuha sang Miss Universe 2025 title.
Sabat ni Miss Ahtisa nga siya ang nagatrabaho na kaupod sa Alon Akademie, nga nagahatag oportunidad sa mga pamatan-on.
Ini agud mahangpan nila nga ang ila sirkumstansya ang indi dapat makapugong sa ila nga padulongan sa palaabuton.
Pahayag sini nga ipadayun niya ang pagtrabaho sa organisasyon kaupod sa Miss Universe agud malab-ot ang mas malapad nga platform.
Pinaagi sini iya maseguro nga ang mga gikan sa low-income backgrounds ang mahatagan sang parehas nga oportunidad sa iban.
